Xegset AQSh operasiyalari narkotrafik yo‘nalishlariga jiddiy ta’sir ko‘rsatganini aytdi

AQShning G‘arbiy yarimsharda narkosavdogarlarga qarshi olib borayotgan operasiyalari asosiy dengiz yo‘nalishlarida ularga tegishli kemalar faolligining rekord darajada kamayishiga olib keldi.

Bu haqda Pentagon rahbari Pit Xegset Panamada bo‘lib o‘tgan Kartellarga qarshi kurash bo‘yicha Amerika koalisiyasi forumidagi chiqishida ma’lum qildi.

«Biz yarimsharimizdagi asosiy dengiz yo‘laklari bo‘ylab narkosavdogarlar kemalari harakatining rekord darajada qisqarganini qayd etmoqdamiz», — dedi Xegset.

Uning so‘zlariga ko‘ra, Karib dengizining g‘arbiy qismida bunday kemalar faolligi kamida 65 foizga, sharqiy qismida esa 60 foizga kamaygan.

Tinch okeanining sharqiy qismida, Galapagos orollarining shimoli va janubidagi hududlarda esa narkosavdogarlar kemalari faolligi qariyb 50 foizga qisqargan.