Venesuela prezidenti: "Bu yil biz Sovet Ittifoqi Qizil Armiyasining fashistlar ustidan qozongan Buyuk G‘alabasining 80 yilligini nishonlaymiz"

Venesuela prezidenti Nikolas Maduro Qizil Armiyaning fashizm ustidan qozonilgan g‘alabaga qo‘shgan hal qiluvchi hissasini qayd etib, tarixni soxtalashtirishga urinishlar haqida ogohlantirdi.

"Bu yil biz Sovet Ittifoqi Qizil Armiyasining fashistlar Germaniyasi armiyasi ustidan qozongan Buyuk G‘alabasining 80 yilligini nishonlaymiz" - dedi Nikolas Maduro Venesuela Oliy sudining tantanali majlisida.

Venesuela rahbari 27 yanvar kuni Polshadagi Aushvis-Birkenau (Osvensim) konslagerining Sovet armiyasi tomonidan ozod qilinganiga 80 yil to‘lganini esladi. Uning so‘zlariga ko‘ra, bugun ular tarixni soxtalashtirishga urinmoqdalar, ammo aynan Qizil Armiya Polshani, Germaniyani va butun Yevropani ozod qildi, o‘sha yillardagi eng zamonaviy qurollar bilan qurollangan 5,4 million askarni mag‘lub etdi, Berlinda Reyxstag ustidan G‘alaba bayrog‘ini ko‘targanini qo‘shimcha qildi.

"Hech kim tarixni o‘chira olmaydi. Qizil Armiya va rus xalqiga sharaf va shon-sharaf", deya qo‘shimcha qildi Nikolas Maduro.