Vashington va Tehron Eron iqtisodiyotiga investisiyalar uchun jamg‘arma tashkil etishni muhokama qilmoqda — The New York Times

Gazeta manbalariga ko‘ra, dastlabki muzokaralar doirasida AQSh va Eron yakuniy kelishuvga erishilgan taqdirda Eronni tiklash uchun xalqaro investisiya jamg‘armasini yaratish imkoniyatini ko‘rib chiqmoqda.

Eronlik mansabdor va bir diplomat uning hajmini 300 milliard dollarga baholamoqda. Biroq muzokaralarda vositachilik qilayotgan boshqa rasmiylar bu raqamlarni tasdiqlamadi.

"Eron davlat xizmatchisi buni yakuniy bitim imzolangan taqdirda, Tehronga va’da qilingan “qayta qurish dasturi” deb atadi. Avvalroq Eron muzokaralarda bombardimonlar yetkazgan zarar uchun tovon puli talab qilgan, ayrim eronlik rasmiylar bu zararni 300 milliard dollardan 1 trillion dollargacha baholagan edi", deya qayd etadi NYT.

Ushbu taklif AQSh prezidentining maxsus vakili Stiv Uitkoff va prezidentning kuyovi Jared Kushner tomonidan ilgari surilgan g‘oyalarning rivojlanishidir, deyiladi xabarda.

Ma’lumotlarga ko‘ra, Tehron vakillari avvalroq Vashington tomoniga sarmoya kiritish va qo‘shma loyihalarni amalga oshirish uchun AQSh kompaniyalariga, jumladan, yirik neft va energetika korxonalariga Eron bozoriga kirishga ruxsat berishni taklif qilgan.

Shu bilan birga hozirda muzokaralari davom etayotgan AQSh va Eron o‘rtasidagi dastlabki kelishuv Eronning xorijdagi mablag‘larining bir qismini muzlatishdan chiqarishni ham nazarda tutishi mumkin. Tehron ularning hajmini 24 milliard dollarga baholamoqda, shundan 20 milliard dollari Yaqin Sharqda bloklab qo‘yilgan.