O‘zbekistonga pul o‘tkazmalari hajmi ikki yildan keyin 20 mlrd. dollarga yetishi mumkin

Markaziy bankning 2025 yilga va 2026-2027 yillarga mo‘ljallangan pul-kredit siyosati konseptual loyihasining asosiy ssenariysi doirasidagi prognozda qayd etilishicha, joriy yil oxirigacha O‘zbekistonga transchegaraviy pul o‘tkazmalari hajmi 25-30 foizga – 14,5-15 milliard dollargacha oshadi.

2025-2027 yillarda pul o‘tkazmalarining yillik o‘sishi «fundamental tendensiya doirasida» 10-15 foizga va 20 milliard dollarga yetishi kutilmoqda.

Mamlakatlarning migrasiya oqimi diversifikasiyasi o‘sishda davom etishi, yuqori daromadli mamlakatlardan pul o‘tkazmalari ularning ulushini oshirishi kutilmoqda.

Prognozlarda qayd etilishicha, dollar, rubl kursi va Rossiya iqtisodiyotining pul o‘tkazmalari hajmiga ta’siri asta-sekin kamayadi (shok hodisalarini hisobga olmagan holda).

Muqobil ssenariyga binoan, davom etayotgan sanksiyalarning kuchayib borayotgan ta’siri tufayli rubl sezilarli darajada qadrsizlanishi mumkin. Bu, bir tomondan, mehnat migrantlarining O‘zbekistonga pul o‘tkazmalari hajmining kamayishiga olib kelsa, ikkinchi tomondan, import inflyasiyasini oshiradi (import tovar va xizmatlar narxining oshishi tufayli mamlakat ichki bozorida narxlar darajasining oshishi).

Muqobil ssenariyga ko‘ra, 2025 yilda o‘tkazmalar hajmining qisqarishi (minus 7-10 foiz) va 2026-2027 yillarda asosiy tendensiyaga nisbatan sekinroq sur’atda (+7-11 foiz) o‘sishi prognoz qilinmoqda. Pul o‘tkazmalari hajmining qisqarishi aholi daromadlari o‘sishini sekinlashtiradi va yalpi iste’mol talabining maqbullashishiga ta’sir qiladi.

Ma’lumot o‘rnida aytish joiz, joriy yilning yanvar-sentyabr oylarida O‘zbekistonga pul o‘tkazmalari hajmi 34,8 foizga oshib, 11,3 mlrd. dollarni tashkil etdi. Janubiy Koreya, Buyuk Britaniya, Polsha va BAAdan tushumlar keskin oshdi, Rossiyaning ulushi esa pasayishda davom etmoqda.

O‘zbekiston iqtisodiyotida pul o‘tkazmalari muhim o‘rin tutadi. Mehnat muhojirlarining pul o‘tkazmalari ko‘plab oilalarning daromadlarini qo‘llab-quvvatlaydi (ayrim hududlarda ular umumiy daromadning chorak qismini tashkil etishi mumkin), ichki talab va iste’molning o‘sishiga yordam beradi, milliy valyuta barqarorligini saqlaydi.