O‘zbekistonda yana bir yirik kompaniya xususiylashtiriladi

Davlat aktivlarini boshqarish agentligi "Boysunko‘mir" kompaniyasining 100 foiz ulushini xususiylashtirish boshlanganini ma’lum qildi.

Toshkentdagi Alkes Research kompaniyasi aktivni sotish bo‘yicha maslahatchi vazifasini bajaradi.

Xususiylashtirishning birinchi bosqichi potensial xaridorlarning arizalarini to‘plashni o‘z ichiga oladi. Ushbu bosqichning bir qismi sifatida ariza beruvchilar maslahatchiga ro‘yxatga olish, aksiyadorlar to‘g‘risidagi ma’lumotlarni va oxirgi uch yil uchun moliyaviy hisobotlarni taqdim etishlari kerak.

Xalqaro sanksiyalarga duchor bo‘lgan davlat korxonasi yoki firma "Boysunko‘mir"ning xaridori bo‘la olmaydi. Elektron pochta orqali arizalarni to‘plash 20 sentyabrgacha davom etadi.

Keyingi bosqichda potensial xaridorlar ma’lumotlarni oshkor etmaslik to‘g‘risidagi shartnomani imzolaydi va kompaniyaning batafsil moliyaviy hisobotlari bilan tanishish imkoniyatiga ega bo‘ladi. Ular garovga qo‘yish va o‘z narxini taklif qilishlari mumkin bo‘ladi.

Ma’lumot uchun, "Boysunko‘mir" ayni damda Surxondaryo viloyatidagi Boysun ko‘mir konini o‘zlashtirmoqda. Kompaniya 2055 yilgacha ko‘mir qazib olish huquqiga ega.