O‘zbekistonda 121 ta tog‘, tog‘ tizmasi va cho‘qqining rasmiy nomlari davlat tili me’yorlariga moslashtirildi. Yangi atamalar xaritalar, rasmiy hujjatlar va davlat reestrlarida majburiy qo‘llaniladi.

O‘zbekistonda geografik ob’ektlar nomlarini tizimlashtirish bo‘yicha navbatdagi muhim qaror qabul qilindi. Vazirlar Mahkamasining «Mamlakatimizdagi ayrim geografik obyektlarning nomlarini davlat tili qoida va me’yorlariga muvofiqlashtirish hamda yangi nom berish to‘g‘risida»gi qaroriga muvofiq, mamlakat hududida joylashgan 121 ta tog‘ tizimi, alohida tog‘ va cho‘qqining rasmiy nomlari davlat tili me’yorlariga muvofiq qayta ko‘rib chiqildi va qonuniy maqomga ega bo‘ldi.

Masalan, Toshkent viloyati Piskom tog‘ tizmasidagi «Adelunga» cho‘qqisi — «Piskom», «Pingvin» cho‘qqisi — «Temirtosh», Chotqol tog‘ tizmasidagi «Anna77» cho‘qqisi — «Egar», «Pioner» cho‘qqisi — «Yangiobod» deb o‘zgartirilgan.

Qaror «Davlat tili to‘g‘risida» va «Geografik ob’ektlar nomlari to‘g‘risida»gi qonunlar ijrosini ta’minlash doirasida qabul qilingan. Hujjatga ko‘ra, tasdiqlangan nomlar endilikda xaritashunoslik materiallari, rasmiy hujjat aylanmasi, davlat kadastrlari hamda turli reestrlarda yagona standart sifatida qo‘llaniladi.

Ishchi jarayon davomida maxsus Respublika komissiyasi faoliyat yuritdi. Komissiya mavjud toponimlarni atroflicha o‘rganib, vaqt o‘tishi bilan shakllangan lingvistik buzilishlar va noaniqliklarni bartaraf etdi. Ayrim holatlarda tarixiy manbalarga tayanilgan holda asl, ilmiy jihatdan asoslangan va milliy merosga mos nomlar tiklandi.

Hukumatda ta’kidlanishicha, geografik nomlarni standartlashtirish faqat texnik yoki ma’muriy masala emas. Bu jarayon milliy madaniy merosni saqlash, tarixiy xotirani himoya qilish va davlat tili nufuzini mustahkamlashning muhim qismi hisoblanadi. Nomlardagi yagona yondashuv rasmiy manbalar o‘rtasidagi tafovutlarni bartaraf etishga xizmat qiladi.

Mutaxassislarga ko‘ra, yangi tasdiqlangan nomlar ta’lim, turizm, ilmiy tadqiqotlar va infratuzilma rejalashtirish sohalarida ham aniqlik va ishonchlilikni oshiradi. Ayniqsa, xaritalar va elektron ma’lumotlar bazalarida turli nomlar qo‘llanilishi bilan bog‘liq muammolarning oldi olinadi.

Mazkur qaror kelgusida boshqa turdagi geografik ob’ektlar — daryolar, ko‘llar va aholi punktlari nomlarini ham tizimli ravishda qayta ko‘rib chiqish uchun asos bo‘lishi kutilmoqda.