Ukrainada amaldor muhim hujjatni oshkor qilib yubordi — Zelenskiy qidiruv boshladi

Ukraina prezidenti Vladimir Zelenskiy Xavfsizlik xizmatiga AQShning foydali qazilmalar bo‘yicha so‘nggi taklifi haqidagi maxfiy ma’lumotlarning tarqalib ketishi yuzasidan ichki tekshiruv o‘tkazishni topshirdi.

Rasmiy shaxslarning aytishicha, ishda poligraf sinovlari qo‘llanilmoqda, deb xabar bermoqda Financial Times.

Tergov Kiyev va Donald Tramp ma’muriyati o‘rtasida Ukrainaning strategik ahamiyatga ega tabiiy boyliklari va energetika infratuzilmasiga oid bitim shartlari bo‘yicha tobora kuchayib borayotgan kelishmovchiliklar fonida olib borilmoqda.

Kiyevdagi amaldorlar ta’kidlashicha, Vashingtonning yangi talablari ular uchun kutilmagan bo‘lgan, tashabbusning ayrim bandlarini esa ular siyosiy jihatdan qabul qilib bo‘lmaydigan deb hisoblashmoqda - eng avvalo, mamlakat suvereniteti va iqtisodiy mustaqilligiga xavf tufayli.

Tergov doirasida bir nechta vazirlik xodimlari yolg‘on aniqlash qurilmasida tekshiruvdan o‘tkazildi. Biroq, hukumat nechta shaxs so‘roq qilingani va ular qaysi aniq tuzilmalarga mansub ekanligi haqida ma’lumot bermadi.

Ukraina prezidenti idorasi izoh berishdan tiyildi, Ukraina xavfsizlik xizmati esa rasmiy bayonotida "Ukraina xavfsizligini himoya qilish" maqsadida amaldagi qonunchilikka muvofiq ish olib borayotganini va ma’lumotlarning bir qismini ularning nozikligi sababli oshkor qilmasligini ta’kidladi.

Tergov 26 mart kuni muxolifatchi deputat Yaroslav Jeleznyak kelishuv loyihasi tafsilotlarini o‘z qo‘liga tushib qolgan nusxaga asoslanib e’lon qilganidan so‘ng boshlandi. Ertasi kuni Financial Times ham alohida olgan hujjatning mazmunini chop etdi. 28 mart kuni axborot tarqalishiga munosabat bildirgan Zelenskiy shunday dedi: "Bu ma’lumotni kim uzatayotgani meni qiziqtirmoqda".