Ukraina hukumati xavfsizlik va mudofaa kuchlari uchun qo‘shimcha 5 milliard grivna ajratdi va bu mablag‘ uchuvchisiz uchoqlarni sotib olishga sarflanadi. Bu haqda Ukraina bosh vaziri Denis Shmigal ma’lum qildi.
«Bugun xavfsizlik va mudofaa kuchlari uchun qo‘shimcha 5 milliard UAH ajratildi. Mablag‘lar front chizig‘idagi himoyachilarimiz uchun zarur bo‘lgan dronlarni sotib olishga sarflanadi», — dedi hukumat rahbari 18 mart, dushanba kuni Telegram’dagi kanalida.
«Ukrainskaya pravda» Ukraina iqtisodiyot vaziri Yuliya Sviridenkoga tayanib xabar berishicha, bugungi kunda uchuvchisiz samolyotlar ishlab chiqaruvchilar bilan 30 milliard grivnaga yaqin shartnomalar tuzilgan va 14 milliard grivnaga shartnomalar tayyorlanmoqda.
