Turkiyada Alisher Navoiy haykali o‘rnatildi

Turkiyaning Anqara shahrida Alisher Navoiy haykali o‘rnatildi. Bu haqda O‘zbekistonning Turkiyadagi elchixonasi xabar berdi.

Qayd etilishicha, haykalning ochilish marosimi “Bir bo‘lsak — yagona xalqmiz, birlashsak — Vatanmiz!” shiori ostida bo‘lib o‘tayotgan O‘zbekiston Mustaqilligining 33 yilligi tadbirlari doirasida tashkil etildi.

“Dunyo” axborot agentligining ma’lum qilishicha, elchixona hamda Kechio‘ren tumani tashabbusi bilan o‘tkazilgan tadbirda, Turkiya Tashqi ishlari vazirligi, TURKSOY tashkiloti, Anqara shahri va tumanlari hokimliklari vakillari, oliy ta’lim muassasalari rektorlari, navoiyshunos va tilshunos olimlar hamda keng jamoatchilik ishtirok etdi.

Tadbirda nutq so‘zlagan elchi Alisher A’zamxo‘jayev Alisher Navoiy haykalining o‘rnatilishida hissa qo‘shganlar, jumladan, Kechio‘ren tumani hokimligi hamda Bashkent universiteti Alisher Navoiy tadqiqot markazi rahbari Abdurahmon Go‘zalga alohida minnatdorlik bildirdi.

“Bugungi kunga qadar Moskva, Dushanbe, Ostona, Tokio, Minsk, Shanxay, Seul va Boku shaharlarida Alisher Navoiy haykallari o‘rnatilgan. Binobarin, Anqarada buyuk ajdodimizning ulug‘vor haykalining ochilishi nafaqat bizlar uchun, balki Turkiyadagi barcha birodarlarimiz, hattoki butun turkiy dunyodagi qardoshlarimiz uchun katta sharaf ekaniga chin dildan ishonaman”, dedi elchi.