Tramp sudda o‘z obro‘siga yetkazgan zarari uchun Merdokdan 10 milliard dollar tovon talab qilmoqda

AQSh prezidenti Donald Tramp mediamagnat Rupert Merdokdan The Wall Street Journal nashri Trampning voyaga yetmaganlarni zo‘ravonlikda ayblanayotgan amerikalik moliyachi Jeffri Epshteynga yuborgan maktubi haqidagi maqola e’lon qilgani tufayli uning obro‘siga yetkazgan zarari uchun 10 milliard dollar tovon talab qilmoqda.

Bu haqda Florida janubiy okrugi sudining elektron ma’lumotlar bazasida e’lon qilingan hujjatda aytiladi.

"Da’vogar prezident Donald Tramp ayblanuvchilardan zarar, sud xarajatlari va sud adolatli deb hisoblagan boshqa tovon pulini kamida 10 milliard dollar miqdorida talab qilmoqda”, — deyiladi hujjatda.

Tramp ishni hakamlar hay’ati ko‘rib chiqishini talab qildi.

Da’voda qayd etilishicha, nashr jurnalistlari "Prezident Tramp 2003 yilda maktubni yozgan, chizgan va imzolagani haqida noto‘g‘ri ma’lumot bergan”, ular “xatni ham, chizmani ham nashr eta olmagan” va Trampning maktubga aloqadorligini isbotlay olmagan. "Bu muvaffaqiyatsizliklarning sababi shundaki, bunday xat yoki chizma mavjud emas. Ayblanuvchilar bu voqeani prezident Trampga tuhmat qilish va uni yolg‘on nuqtai nazardan ko‘rsatish uchun o‘ylab topishgan", - deyiladi da’vo arizasida.

Bu ish bo‘yicha ayblanuvchilar - Merdok va u asos solgan News Corporation mediaxoldingi, shuningdek, Trampning Epshteynga yozgan maktubi haqida maqola yozgan The Wall Street Journalning ikki jurnalisti. Nashrning yozishicha, Tramp moliyachining yubileyiga sovg‘a sifatida qo‘lda chizilgan yalang‘och ayol bilan xat yuborgan. Chizma tabrik yozuvi bilan birga bo‘ldi. Ushbu nashrga javoban Oq uy rahbari gazeta va Merdokni sudga berish niyati borligini e’lon qilib, chizma haqidagi ma’lumotlarning yolg‘onligi haqida matbuotni oldindan xabardor qilganini ta’kidladi.