Tramp: "Isroil arab davlati rivojlanishiga to‘sqinlik qilmaslik uchun Suriyaning yangi rasmiylari bilan muloqotni davom ettirishi kerak"

AQSh prezidenti Donald Tramp Isroilni arab davlati rivojlanishiga to‘sqinlik qilmaslik uchun Suriyaning yangi rasmiylari bilan muloqotni davom ettirishga chaqirdi.

Bu haqda Tramp Truth Social nashrida yozdi.

"Isroilning Suriya bilan kuchli va halol muloqotni davom ettirishi va Suriyaning gullab-yashnagan davlatga aylanishiga hech narsa to‘sqinlik qilmasligi juda muhim", deb ta’kidladi Tramp.

Tramp Vashington ma’muriyati Suriyada erishilgan natijalardan mamnun ekanligini va hukumat o‘z maqsadlarini amalga oshirishda davom etishi uchun barcha sa’y-harakatlarini amalga oshirayotganini ta’kidladi.

"Biz Suriya hukumati o‘z rejalarini amalga oshirishda davom etishi uchun barcha imkoniyatlarni ishga solyapmiz, bu haqiqiy va farovon mamlakat qurish uchun zarurdir. Ularga katta yordam bergan omillardan biri mening o‘ta qattiq va og‘riqli sanksiyalarni to‘xtatib qo‘yishim bo‘ldi – o‘ylaymanki, buni Suriya, uning rahbariyati va xalqi chin dildan qadrlashdi!" dedi u.

Amerika rahbari, shuningdek, Suriyaning yangi prezidenti Ahmad al-Shara Suriya va Isroil o‘rtasidagi ijobiy o‘zgarishlar hamda uzoq va farovon munosabatlarni ta’minlash uchun astoydil harakat qilayotganini ta’kidladi. Trampning so‘zlariga ko‘ra, bu Yaqin Sharqda tinchlikka erishishga hissa qo‘shadigan tarixiy imkoniyatdir.