Tojikistonda noqonuniy mayning uchun javobgarlik kuchaytirildi

Tojikiston parlamenti noqonuniy kriptovalyuta mayningi uchun javobgarlikni kuchaytirishga qaratilgan Jinoyat kodeksiga o‘zgartirishlarni ma’qulladi.

Mamlakat Jinoyat kodeksiga 253(2)-modda — “Virtual aktiv ishlab chiqarish maqsadida elektr energiyasidan noqonuniy foydalanish” kiritilmoqda.

Qonunga muvofiq:
➖ kriptovalyuta mayningi uchun elektr energiyasidan noqonuniy foydalanish 1650–4070 AQSh dollari miqdorida jarimaga sabab bo‘ladi;
➖ agar qoidabuzarlik bir guruh shaxslar tomonidan yoki ayniqsa yirik miqdorda sodir etilsa, 4125–8250 dollar jarima yoki 2 yildan 5 yilgacha ozodlikdan mahrum etish jazosi qo‘llaniladi;
➖ mayning maqsadida elektr energiyasini yirik miqdorda, guruh bo‘lib talon-taroj qilish 5 yildan 8 yilgacha ozodlikdan mahrum etish bilan jazolanadi.
Tojikiston Bosh prokurori Habibullo Vohidzodaga ko‘ra, noqonuniy mayning ayrim hududlarda elektr energiyasi tanqisligi va tez-tez o‘chishlarga sabab bo‘lmoqda. Uning ma’lum qilishicha, mamlakatda noqonuniy mayningdan yetkazilgan zarar 3,52 million AQSh dollarini tashkil etgan.