Sobiq prezidentning generali Mossad agenti bo‘lib chiqdi - OAV

Suriya xavfsizlik xizmatining sobiq generali Xolid al-Halabiy Avstriyada urush jinoyatlarida ayblanib sudlanmoqda. New York Times ma’lumotlariga ko‘ra, u Bashar Assad hukmronligi davrida muxoliflarga nisbatan shafqatsiz qiynoqlar qo‘llangan 335-bo‘limni boshqargan va 2011–2013 yillardagi vahshiyliklarda bevosita ishtirok etgani iddao qilinmoqda.

Raqqa shahridagi hibsxona kamerasidagi qiynoqqa solish mexanizmi. 2013 yil, aprel.
Foto: Bryan Denton

Prokurorlar ayblovida yana bir muhim da’vo keltirilgan: Al-Halabiy Suriya maxsus xizmatlariga ishlagan holda, bir vaqtning o‘zida Isroilning Mossad razvedkasi bilan ham hamkorlik qilgan. 2013 yilda Suriyadan qochgan generalga avval Mossad Parijga yetib borishda yordam bergan, keyin esa Avstriya razvedkasi ko‘magida uni Venaga joylashtirgani aytilmoqda.

U Yevropa hududida to‘qqiz yildan ziyod vaqtini yashirin hayot kechirib o‘tkazgan. 2024 yil dekabrida uning Budapeshtdagi ko‘prikda tushgan surati tergovchilarga o‘rnini aniqlashda yordam berib, qo‘lga olinishiga sabab bo‘lgan. Shu orada, 2023 yilda esa himoya qilganlikda ayiblangan bir necha avstriyalik fuqarolar ham javobgarlikka tortilgan.