Sardoba toshqinidan jabr ko‘rgan aholi uchun qurilgan uylarning narxi 855,4 mlrd. so‘mni tashkil etdi. Bu haqda AOKAda Sirdaryo viloyati hokimi o‘rinbosari O‘lmasjon Mamadaminov ishtirokida o‘tkazilgan brifingda ma’lum qilindi:
«4 790 nafar xonadon egalariga 186,6 mlrd. so‘m moddiy yordam mablag‘lari plastik kartalarga tushirildi. Shundan, 4 541 ta fuqaroga 181,6 mlrd.so‘m (40 mln. so‘mdan) va 249 ta fuqaroga 5,0 mlrd.so‘m (20,0 mln so‘mdan).
Toshqin oqibatida uy-joylariga jiddiy zarar yetgan fuqarolar uchun jami 52,5 ga yer maydonlari tanlanib, 2 640 ta xonadonli 86 ta ko‘p qavatli turar joy qurildi. Mazkur ko‘p qavatli uylarning narxi shartnoma bo‘yicha 855,4 mlrd. so‘m.
2 577 ta xonadon respublika, viloyat va tumanlar ishchi guruhlari hamda jamoatchilik vakillari tomonidan adolatli o‘rganilib, qur’a tashlash yo‘li bilan egalariga topshirildi».
