Samarqandda bog‘cha yonib ketdi

Samarqand viloyati Past Darg‘om tumanida joylashgan bog‘cha binosi yonib ketdi. Bu haqda viloyat Favqulodda vaziyatlar boshqarmasi xabar bermoqda.

Hodisa 2024 yil 11 dekabr kuni kechki payt sodir bo‘lgan. Shu kuni soat 20:40 da Past Darg‘om tumani Amir Temur mahallasida joylashgan maktabgacha ta’lim muassasasi binosida yong‘in sodir bo‘lgani to‘g‘risida tuman FV bo‘limiga xabar berilgan.

Shunga ko‘ra, 5 ta yong‘in-qutqaruv ekipajlari jalb qilinib, ular voqea joyiga soat 20:43 da yetib borgan va 21:55 da yong‘in to‘liq bartaraf etilgan.

Yong‘in oqibatida maktabgacha ta’lim tashkiloti binosining shift va tom qismi yonib zararlangan. Hodisada hech kim jabrlanmagan va halok bo‘lmagan.

Qayd etilishicha, hozirda tergovga qadar tekshirish ishlari olib borilib, yong‘inning kelib chiqish sababi aniqlanmoqda.