Rossiya yadro kuchlari dunyodagi eng yuqori darajada hisoblanadi — Vladimir Putin

Rossiya prezidenti bu haqda Bosh shtab boshlig‘i Valeriy Gerasimov va guruh komandirlari bilan yig‘ilishda aytib o‘tdi.

"Rossiya shu hafta yadro kuchlari mashg‘ulotlari chog‘ida istiqbolli qurol namunalari sinovlarini o‘tkazdi. Rossiyaning yadro qalqoni o‘z ishonchliligini tasdiqladi", — dedi prezident.

Putin, shuningdek, “Burevestnik” raketasining sinovlari yakunlanganini bildirdi. Uning ta’kidlashicha, yadroviy energiya tizimiga ega “Burevestnik” qanotli raketasi dunyoda o‘xshashi bo‘lmagan noyob qurol hisoblanadi.

Gerasimovning Putinga bergan hisobotiga ko‘ra, “Burevestnik” raketasi sinovi 21 oktyabr kuni o‘tkazilgan, raketa 14 ming kilometr masofani bosib o‘tgan.
Uning aytishicha, “Burevestnik” raketalarga qarshi mudofaa tizimlarini aylanib o‘tish imkoniyatlarini namoyish qilgan.

Putin shuningdek, bu raketani jangovar navbatchilikka qo‘yish uchun hali katta ishlar bajarilishi kerakligini ta’kidladi.