Lvov shahrining aholisi suvsiz qoldi

Ukraina g‘arbidagi Lvov shahrida magistral quvurning katta yorilishi 50 mingga yaqin mijozni suvsiz qoldirdi.

Bu haqda shahar hokimining birinchi o‘rinbosari Andrey Moskalenko ma’lum qildi.

"Ayni paytda 50 mingga yaqin abonent suvsiz qolmoqda. Muammo nimada? Avvalgi yorilishdan keyin suv tiklanganida, eski quvurlar tufayli yorilish yuz bergan", - deydi u.

Rasmiyning ta’kidlashicha, barcha eskirgan quvurlarni almashtirish uchun 10 milliard grivna (238,7 million dollar) kerak bo‘ladi, bu mablag‘ shahar byudjetida yo‘q.

"Lvovvodokanal" ma’lumotlariga ko‘ra, yorilish so‘nggi o‘n yilliklardagi eng kattasi. Dastlab Domajir qishlog‘ida diametri 600 mm bo‘lgan magistral suv quvuri yorilib, Lvov yaqinidagi 13 qishloq, shuningdek, viloyat markazining bir necha ko‘chalari suvsiz qolgan. Ta’mirlashdan keyin ba’zi qishloqlar suv oldi, biroq yana bir nechta yorilishlar yuz berdi.

25 oktyabr kuni ertalab kommunal xizmatchilar navbatdagi ta’mirlash ishlarini yakunlab, 30 kilometrdan ortiq magistral liniyalar va yirik suv omborlarini to‘liq bo‘shatgan avariyadan so‘ng tizimni bosqichma-bosqich to‘ldirishni boshladilar.

Biroq bu jarayon davomida Domajir qishlog‘i yaqinida yana bir magistral suv quvuri yorilib, nasos stansiyalarida bosim tushib ketgan.

Kompaniyaning ta’kidlashicha, ular hech qachon bunday holatga duch kelmaganlar.

"Biz tan olishga majburmiz: "Lvovvodokanal" so‘nggi o‘n yilliklardagi shaharni suv ta’minoti bo‘yicha eng jiddiy muammoga duch kelmoqda. Hatto kompaniya faxriylari ham shaharning bir qismi uch kun davomida suvsiz qolgan va qayta-qayta sodir bo‘lgan baxsiz hodisalar ta’minotni barqarorlashtirishga to‘sqinlik qilgan vaziyatlarni eslay olmaydi", - deyiladi bayonotda.

Kommunal xizmatchilarning qo‘shimcha qilishicha, markazlashtirilgan suv ta’minoti tiklanmaguncha suv tashuvchi avtomashinalar ishlashda davom etadi.