Rossiya va Ukraina urushi 2030 yilgacha tugashi kerak – Belgiya Bosh shtabi boshlig‘i

Mamlakat Qurolli kuchlari Bosh shtabi boshlig‘i Frederik Vansina "Le Soir" nashriga bergan intervyusida Rossiya va Ukraina o‘rtasidagi urush 2030 yilgacha yakunlanishi lozimligini ta’kidladi. Uning fikricha, urush tugaganidan keyin Yevropa Rossiyani tiyib turish uchun yetarlicha kuchli bo‘lishi shart.

"2030 yil Yevropa uchun og‘ir davr bo‘ladi. O‘sha vaqtga kelib Rossiya 650–700 ming nafar tajribali jangchilardan iborat armiyaga ega bo‘lib qoladi", — dedi Vansina.

Generalning so‘zlariga ko‘ra, Yevropa 2030 yilgacha hatto AQSh yordamisiz ham Putinga qarshi tura olishini isbotlashi kerak.

"Bizda hali bir necha yil vaqt bor. Kiyev o‘zining jasorati va qoni evaziga biz uchun mana shu vaqtni sotib olmoqda. Shu sababli ham biz ularni qat’iy qo‘llab-quvvatlayapmiz", — deya qo‘shimcha qildi Frederik Vansina.