Ramazon: iftordan saharlikkacha qancha suv ichish kerak? Toshkent shahar hokimligi tavsiya berdi

Tahlillarga ko‘ra, insoniyat tanasining qarishi ma’yoridan ortiq ovqat iste’mol qilish va to‘g‘ri ovqatlanmaslik bilan bog‘liq ekan.

Ro‘za esa ochlikni sabr bilan yengishga o‘rgatishi qatori saharlik va iftorlikda to‘g‘ri ovqatlanishga amal qilinsa, ro‘zadorga yana ko‘plab foydalarni hadya etadi.

Bunda tana uchun eng muhimi suv me’yorini joyiga keltirishdir. Ro‘zador inson kun davomida chanqog‘ini yenggani bois tanasida suvsizlanish kuzatiladi. Shu bois ro‘zador inson iste’mol qilayotgan suv miqdorini nazorat qilishi va doimiyligini ta’minlashi ahamiyatlidir.

Tibbiyotchilarning xulosasiga ko‘ra, iftordan saharlikkacha bo‘lgan vaqtda eng kamida ikki litr suvni bo‘lib-bo‘lib ichish zarur. Masalan, iftorlikka yarim litr suv ichilsa, keyin har soatda 0,3 litr suv is’temol qilish maqsadga muvofiq bo‘ladi. Darvoqe, iftorlik suviga  bir qoshiq asal qo‘shilsa, u nafaqat oziqlantiruvchi, balki shifobaxsh, antibakterial ichimlikka aylanadi.

Ro‘za tutganda, ayniqsa, iftorlik mahali xurmo is’temol qilish an’anaga aylangani bejiz emas. Xurmo inson tanasidagi quvvat – energiyani tiklab beruvchi vitamin va minerallarga boy mevadir.

Ro‘zada tarkibida kofein moddasi bo‘lgan ichimliklar, ya’ni choy, qahvadan tiyilgan ma’qul. Ular tashna organizmga foyda bermaydi, aksincha, undagi muhim mineral – magniy va boshqa vitaminlarni chiqarib yuboradi, tanadagi namlikni quritadi. Agar inson choy va qahva ichishdan o‘zingizni cheklay olmasa, unda iste’mol qilinadigan suv miqdorini oshirishi zarur.

Iftorlikda suv va xurmo bilan og‘iz ochgandan so‘ng turli mevalardan tayyorlangan salat yoki meva sharbati iste’mol qilinsa ayni muddao bo‘ladi. Zero, mevalar – suv, vitamin, minerallarga boy, tabiiy ne’mat. Meva sabzavotga qaraganda tezroq parchalanadi, ovqat hazm qilish kanallarini ochadi va tanani vitamin, minerallar bilan boyitadi.

Va nihoyat, eng asosiy eslatma, kun davomida och yurib, iftorda birdaniga ko‘p ovqat yeyish ro‘zaning hikmatiga zid, qolaversa, oshqozonga og‘irlik qilib, oqibatda inson sog‘ligiga salbiy ta’sir qilishini unutmaslik muhim.