Qirg‘izistonda sobiq Bosh prokurorning o‘rinbosari davlat to‘ntarishi qilmoqchi bo‘ldi

Qirg‘iziston Ichki ishlar vazirligi xodimlari davlat to‘ntarishi uyushtirmoqchi bo‘lganlarni qo‘lga oldi. Bu haqida vazirlik matbuot xizmati ma’lum qilgan.

Qayd etilishicha, jamoatchilik va siyosiy vaziyatni beqarorlashtirish va ommaviy tartibsizliklar chiqarishga tayyorlanayotgan bir guruh aniqlangan.
Bu guruh ommaviy tartibsizliklar uyushtirish, hokimiyatni kuch ishlatish yo‘li bilan egallash maqsadida tuzilgan. Har bir ishtirokchiga o‘z vazifalari (tashkilotchilar, yordamchilar, moliyaviy qo‘llab-quvvatlovchilar, bajaruvchilar) taqsimlangan.

Bishkekning chekka hududida sport o‘yinlari va boshqa musobaqalarni o‘tkazish bahonasida ular konstitusiyaga qarshi chaqiriqlar qilishga, holatni beqarorlashtirishga va 2024 yil 17 noyabrda o‘tkaziladigan mahalliy kengash saylovlarida hokimiyatni zo‘rlik bilan egallashga urinishni rejalashtirgan.

O‘tkazilgan tergov va razvedka tadbirlari davomida ishtirokchilar qo‘lga tushgan. Ularning 7 nafari to‘g‘risida ma’lumot berilgan bo‘lib, har biriga turlicha vazifalar yuklangan. Uyida o‘tkazilgan tintuvda qurollar va granatalar topilgan.
Masalan, davlat to‘ntarishi o‘tkazganlardan biri xorijdagi jangovar harakatlarda ishtirok etgan, uning vazifalari orasida: jismoniy tayyorlangan shaxslarni tanlash, ularni yollash va yo‘riqnomalar berish, alkogol ichimliklari, oziq-ovqat xarid qilish, ommaviy tartibsizliklar vaqtida huquqni muhofaza qilish organlarining harakatlarini kuzatish va ma’lumotni tashkilotchilarga yetkazish bo‘lgan. Ular orasida narkotik moddalar saqlagani va jinoyati uchun sudlanganlari ham mavjud.

Asosiy tashkilotchi A.u.K., Jalol-obod viloyatidan, sobiq Bosh prokurorning o‘rinbosari, uning vazifasi moliyaviy ta’minot, huquqni muhofaza qilish organlari bilan aloqalar, ular haqida ma’lumot yetkazish, rollarni taqsimlash va ommaviy tartibsizliklar va hokimiyatni zo‘rlik bilan egallashda muvofiqlashtirish bo‘lgan.

Shu tarzda, ommaviy tartibsizliklarni uyushtirish va hokimiyatni egallashga qaratilgan bu guruhning faoliyati to‘xtatilgan. Mazkur holat yuzasidan Jinoyat kodeksining 36-moddasi, 278-moddasi 1-qismi (ommaviy tartibsizliklarni uyushtirishga tayyorlanish, zo‘rlik, talon-toroj, yondirish, mol-mulkni yo‘q qilish, o‘qotar qurol, portlovchi moddalar yoki portlovchi qurilmalar ishlatish, yoki hokimiyat vakillariga qurolli qarshilik ko‘rsatish) bo‘yicha jinoyat ishi ochilgan.