Qibray tumanida kuchli ta’sir qiluvchi dori vositalari savdosi bilan shug‘ullanib kelgan shaxslar ushlandi

Bosh prokuratura huzuridagi Departamentning Qibray tumani bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda kuchli ta’sir qiluvchi dori vositalari savdosi bilan shug‘ullanib kelgan M.M.ning (muqaddam sudlangan) “BYD CHAZOR” rusumli avtotransport vositasi to‘xtatilib ko‘zdan kechirilayotganda avtomashina yo‘lovchisi U.M. qora rangli polietilen paketni ko‘chaga tashlab yuborgan paytda ushlanib, ushbu paketdan 12 dona yelim idish va “zakladka” yo‘li bilan sotish maqsadida olib kelingan 28 dona oq rangli idishda kuchli ta’sir qiluvchi vositalar topilgan.

Shuningdek, avto transport vositasining old o‘rindig‘idan 3 dona dori vositasi, 3 dona mobil telefon va 9 dona bank plastik kartalari ashyoviy dalil sifatida olingan.

Mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.