Qayta tiklangan Toshkent chinni zavodi ishga tushirildi

Prezident Shavkat Mirziyoyev Olmazor tumanida yangi joyda qad rostlagan Toshkent chinni zavodini borib ko‘rdi. Bu haqda prezident matbuot xizmati xabar qildi.

Davlat rahbari bu zavodning qayta tiklanishi haqida o‘tgan yili 29 iyun kuni Olmazor tumani aholisi bilan muloqot chog‘ida aytgan edi.

Prezident topshirig‘iga muvofiq, zavod faoliyatini qayta tiklash maqsadida “Aloqabank” tomonidan umumiy qiymati 87 milliard so‘mlik loyiha amalga oshirildi. Foydalanilmayotgan ob’ekt rekonstruksiya qilinib hamda qo‘shimcha binolar qurilib, Xitoyning “Huanggang Huauao Zhongbo Klin Technology Co. Ltd.” kompaniyasi uskunalari o‘rnatildi. 300 ta ish o‘rni yaratildi.

Prezident Shavkat Mirziyoyev Olmazor tumanida yangi joyda qad rostlagan Toshkent chinni zavodini borib ko‘rdi.

Zavodda yiliga 30 million dona oshxona idishlari, suvenirlar, binolarning ichki bezaklari ishlab chiqariladi. Yuz foiz mahalliy xomashyodan foydalaniladi. Mahsulotlar import o‘rnini to‘ldirib, Rossiya, Ukraina, Gruziya, Ozarbayjon va Markaziy Osiyo davlatlariga eksport ham qilinadi.

“Bu zavod O‘zbekistonning faxri, - dedi Shavkat Mirziyoyev. - Ilgari respublikamizga mehmon kelsa yoki yurtdoshlarimiz chet elga borsa, shu zavod to‘plamlaridan sovg‘a qilinardi. Endi ushbu yangi korxona undan ham chiroyli, sifatli va qadrli mahsulotlar tayyorlashi kerak”.

Zavodda yiliga 30 million dona oshxona idishlari, suvenirlar, binolarning ichki bezaklari ishlab chiqariladi.

Mutasaddilar bilan suhbatda zavod faoliyatini kengaytirib, klasterga aylantirish, yanada ko‘p xotin-qizlar va yoshlarni ishga jalb etish bo‘yicha ko‘rsatmalar berildi.

Shu yerda Toshkent shahrida amalga oshiriladigan sanoat va investisiya loyihalari taqdimoti ham o‘tkazildi. Prezident eksportni rivojlantirish, tashqi savdo amaliyotlarini yengillashtirish maqsadida Toshkent shahri uchun zamonaviy multimodal logistika markazi tashkil etish taklifini bildirdi.