Qarshi shahridagi ko‘p qavatli uyda gazdan noqonuniy foydalanish holati aniqlandi

Qarshi shahrida ko‘p qavatli uyda tabiiy gazdan noqonuniy foydalanish holati aniqlanib, 4 mlrd so‘mdan ortiq zarar hisoblandi.

Bu haqda «Hududgazta’minot» AJ ma’lum qildi.

«Hududgaz Qashqadaryo» gaz ta’minoti filiali hamda shahar gaz ta’minoti bo‘limi xodimlari, «O‘zenergoinspeksiya» va huquq-tartibot organlari hamkorligida Qashqadaryo viloyati Qarshi shahrida o‘tkazildi.

Tekshiruvlar davomida shaharning «Paxtazor» kichik tumanida joylashgan «M. SH. Q. S.» MCHJga qarashli ko‘p qavatli turar-joy binosi tabiiy gaz ta’minoti korxonasi bilan shartnoma tuzilmasdan, loyiha hujjatlari rasmiylashtirilmasdan hamda tarmoqqa to‘g‘ridan-to‘g‘ri ulangan holda gazdan noqonuniy foydalanib kelayotgani aniqlandi.

Mazkur holat yuzasidan tegishli dalolatnoma rasmiylashtirilib, dastlabki hisob-kitoblarga ko‘ra 4 milliard 90 million 141 ming so‘m miqdorida zarar yetkazilgani ma’lum bo‘ldi. Barcha hujjatlar belgilangan tartibda huquq-tartibot organlariga yuborildi.