Putin: "Rossiya neftining jahon bozorlariga yetkazib berilishi global iqtisodiyotga ijobiy ta’sir ko‘rsatadi"

Rossiya neft va neft mahsulotlarini jahon bozorlariga yetkazib berish global iqtisodiyotga ijobiy ta’sir ko‘rsatadi.

Bu haqda Rossiya prezidenti Vladimir Putinning AQSh prezidenti Donald Tramp bilan muzokaralardan so‘ng Kreml veb-saytida e’lon qilingan bayonotida aytilmoqda.

"Global energetika vaziyatini muhokama qilish jarayonida Rossiya tomoni AQSh va global bozorlarga neft va neft mahsulotlarini yetkazib berishga tayyorligini tasdiqladi. Ishonchim komilki, bu butun global iqtisodiyotga ijobiy ta’sir ko‘rsatadi", deb ta’kidladi Putin.

Rossiya prezidentining so‘zlariga ko‘ra, Tramp bilan telefon orqali suhbati davomida Ukraina mojarosini hal qilish istiqbollari, Eron atrofidagi vaziyat va ikki tomonlama munosabatlarning turli jihatlariga ham jiddiy e’tibor qaratildi.

"Ikki mamlakat prezidentlari o‘rtasidagi shaxsiy aloqalarni davom ettirish, shuningdek, prezident ma’muriyatlari, razvedka xizmatlari va boshqa idoralar o‘rtasidagi hamkorlik to‘g‘risidagi kelishuv tasdiqlandi", deb qo‘shimcha qildi Putin.