Poytaxtning to‘rt tumanida elektr ta’minoti uchun cheklovlar joriy etildi

24 iyul kuni Toshkent shahridagi Chilonzor, Yakkasaroy, Mirobod va Yashnobod tumanlarida elektr ta’minotida majburiy cheklovlar joriy etildi. Bu chora «HET» kompaniyasi tomonidan ortiqcha yuklanishni oldini olish maqsadida amalga oshirilgani aytilmoqda.

«Hududiy elektr tarmoqlari» AJning ma’lumotiga ko‘ra, 24 iyul kuni soat 14:00 ga qadar umumiy quvvati 16 MW bo‘lgan elektr ta’minoti cheklovlari amalga oshirildi. Cheklovlar asosiy tarzda transformatorlarning ortiqcha yuklanishini oldini olish va katta avariyalarning oldini olish uchun kiritilgani ta’kidlangan.

Keyinroq «HET» AJning rasmiy Telegram kanalidan bu xabar o‘chirib tashlangan, biroq 1055 kommunal dispetcherlik guruhida fuqarolarga liniyadagi zo‘riqishlar sabab ko‘rsatib o‘tilgan tumanlarda 2-3 soatlab elektr bo‘lmasligi tushuntirilgan.

Gazeta.uz nashrining yozishicha, cheklovlar quyidagi nimstansiyalar va tumanlarni qamrab olgan:

• «Chilonzor» nimstansiyasi — 4 MW, Chilonzor va Yakkasaroy tumanlari;
• «Qo‘qon» nimstansiyasi — 4 MW, Mirobod va Yakkasaroy tumanlari;
• «MJK» nimstansiyasi — 4 MW, Mirobod va Yashnobod tumanlari;
• «Risovaya» nimstansiyasi — 4 MW, Mirobod va Yashnobod tumanlari.

Ayni paytda rasmiy manbalar cheklovlar qancha davom etishi va qachon bartaraf etilishi haqida aniq ma’lumot bermagan.