Panamadagi 7,7 magnitudali zilziladan so‘ng 746 ta aftershok qayd etildi

Panamada 9 oktyabr kuni sodir bo‘lgan 7,7 magnitudali zilziladan keyin 746 ta takroriy yer silkinishi qayd etildi. Bu haqda Panama universiteti Yer fanlari instituti direktori Nestor Luke mamlakatning La Prensa gazetasiga bergan intervyusida ma’lum qildi.

Luke so‘nggi bir hafta davomida mamlakatda kuzatilgan seysmik faollikka alohida e’tibor qaratdi. Uning so‘zlariga ko‘ra, kuchli zilziladan keyin bir necha yuzta takroriy yer silkinishi sodir bo‘lgan.

«Bunday magnitudali zilziladan keyin aftershoklar bir oydan ikki oygacha davom etishi mumkin», — dedi mutaxassis.

Uning tushuntirishicha, zilzila natijasida ajralib chiqqan energiya tektonik bloklar o‘rtasidagi kuchlanishlarning qayta taqsimlanishiga va muvozanatning tiklanish jarayoniga ta’sir ko‘rsatishda davom etadi.

9 oktyabr kuni Panamaning janubiy chekkasi yaqinidagi Pitalosa-Arriba hududida sodir bo‘lgan 7,7 magnitudali zilzila oqibatida 30 kishi jarohatlangan, yuzlab aholi esa boshpanasiz qolgan.