Nvidia Osiyo mamlakatlaridagi xaridorlari sonini ikki barobardan ko‘proqqa qisqartirdi

Bu bilan kompaniya o‘z chiplari Xitoyga tushib qolmasligi uchun harakat qilmoqda.

Financial Times nashri ma’lumotlariga ko‘ra, tekshiruv Nvidia’ning Singapur, Malayziya va Yaponiyadagi avvalgi mijozlarini qamrab oldi. Ularning aksariyati "neo-bulutli provayderlar", ya’ni SI-modellarning ish yuklamalari uchun maxsus bulutli platformalar yaratish va ularni boshqarishga ixtisoslashgan kompaniyalar bo‘lgan.

Tekshiruvlar natijasida ishlab chiqaruvchi hamkorlikni davom ettiradigan kompaniyalarning "oq ro‘yxati" tuzildi. Unga Nvidia’ning avvalgi mijozlarining yarmidan kamrog‘i kirdi.

Nazoratning kuchaytirilishi Tramp ma’muriyatining ilg‘or AQSh mikrosxemalari uchinchi mamlakatlar orqali Xitoy kompaniyalariga yetib borishining oldini olishga qaratilgan intilishi bilan bog‘liq. Qo‘shma Shtatlarning ilg‘or prosessorlarini Xitoyga eksport qilish ko‘p yillardan buyon taqiqlangan.

Avvalroq Tramp Pekinga Nvidia H200 chiplarini sotishga ruxsat bergan, (bu chiplar ilg‘or ishlanmalardan sezilarli darajada ortda qoladi), biroq ularning sotuvi Xitoy rasmiylarining o‘zlari tomonidan mahalliy sanoatni qo‘llab-quvvatlash maqsadida bloklanmoqda.