Navoiyda savdo markazi yonib ketdi

Bugun Navoiy viloyati Karmana tumanidagi savdo majmuasida yong‘in chiqdi. Bu haqda Favqulodda vaziyatlar vazirligi xabar berdi.

Qayd etilishicha, soat 05:15 da Navoiy viloyati Karmana tumani “Arg‘un” MFY Arg‘un shoh ko‘chasida joylashgan savdo majmualarining birida yong‘in sodir bo‘layotgani to‘g‘risida 112 tizimi orqali FVBga xabar tushgan. Shunga ko‘ra, yong‘in-qutqaruv ekipajlari soat 05:18 da hodisa joyiga yetib borib, yong‘in soat 05:50 da qurshab olingan va 06:24 da bartaraf etilgan.

Bildirilishicha, yong‘inda savdo majmuaning 200 kvadrtat metr maydoni ichki qismi hamda mahsulotlari yongan. Yong‘inni bartaraf etishga 6 ta asosiy turdagi hamda 1 ta maxsus turdagi texnika jalb etilgan. Hodisa oqibatida tan-jarohati olganlar to‘g‘risida ma’lumot tushmagan.