NATOning asosiy a’zosi 5 yil ichida Yevropada katta urush bo‘lishi mumkinligi haqida ogohlantirdi

Agar Kreml AQShni Yevropadagi ittifoqchilariga yordam berishga tayyor emas deb hisoblasa, Yevropa urushi xavfi yanada kuchayishi mumkin.

Daniya Mudofaa razvedka xizmati (DDIS) ma’lum qilishicha, Rossiya besh yil ichida Yevropada katta urush boshlashga tayyor bo‘lishi mumkin.

Agentlikning ta’kidlashicha, Kreml NATOdagi zaiflik yoki siyosiy bo‘linishning har qanday alomatidan foydalanib, harbiy tajovuz orqali o‘z milliy manfaatlarini yanada ilgari surishi mumkin.

Agar Kreml AQShni Yevropadagi ittifoqchilariga yordam berishga tayyor emas deb hisoblasa, bu xavf yanada kuchayadi.

Yangilangan xavfsizlik baholashida Rossiya allaqachon NATO bilan urushga tayyorgarlik ko‘rayotgani va harbiy salohiyatini oshirayotgani qayd etilgan.

DDIS Ukrainada urush to‘xtatilgandan so‘ng yuzaga kelishi mumkin bo‘lgan uchta ehtimoliy ssenariyni taklif qildi.

Uning tahlili Rossiya bir vaqtning o‘zida faqat bitta davlat bilan urush olib borishi mumkinligi haqidagi taxminga asoslangan.

Birinchi ssenariyga ko‘ra, Kreml olti oy ichida chegaradosh davlat bilan urush boshlashga qodir bo‘ladi.

Ikkinchi ssenariyda esa Moskva ikki yil ichida mintaqaviy urushga tayyorlanib oladi.

Besh yildan so‘ng esa, AQSh aralashmaydigan bo‘lsa, Yevropaga keng ko‘lamli hujum uyushtirishi mumkin.

Hisobot mualliflari shunday yozishgan: "Agar Rossiya NATOni harbiy jihatdan zaiflashgan yoki siyosiy jihatdan parchalangan deb hisoblasa, NATOning bir yoki bir nechta Yevropa davlatlariga qarshi mintaqaviy urushda harbiy kuch ishlatishga ko‘proq moil bo‘lishi ehtimol."

"Ayniqsa, Rossiya AQShning NATO a’zosi bo‘lgan Yevropa davlatlarini Rossiyaga qarshi urushda qo‘llab-quvvatlay olmasligini yoki qo‘llab-quvvatlamasligini taxmin qilsa, bu ehtimol yanada kuchayadi."

Donald Tramp NATO a’zo davlatlarini mudofaaga ko‘proq mablag‘ ajratishga chaqirib, yalpi ichki mahsulotning 5 foizini xavfsizlikka sarflash kerakligini aytdi. Bu hozirgi maqsaddan ikki barobar ko‘pdir.