Mo‘g‘uliston mamlakat bo‘ylab masofaviy o‘qishni joriy qilmoqchi

Mo‘g‘uliston Bosh vaziri Gombojavin Zandanshatar Sog‘liqni saqlash vazirligi va Ta’lim vazirligi vakillari bilan maktab ta’tilini erta boshlash masalasini muhokama qilish uchun uchrashdi, deb xabar beradi Montsame.

Sog‘liqni saqlash vazirligi rasmiylari milliy xavfni baholashni taqdim etishdi va joriy yilning 15 dekabriga qadar gripp va grippga o‘xshash kasalliklar avjiga chiqishini xabar qilishdi. Shu munosabat bilan boshlang‘ich maktablarda ta’tilni rejalashtirilganidan 14 kun oldin e’lon qilish yoki masofaviy o‘qishga o‘tish taklif qilindi. Biroq, Ta’lim vazirligi bu taklifni darhol qabul qila olmasligini ta’kidladi.

Tomonlarning fikrlarini tinglab, Bosh vazir Zandanshatar barcha darajalarda infeksiyadan himoya qilish tartibi va choralarini ustuvor vazifa sifatida ta’minlashni buyurdi.

Barcha darajadagi tashkilotlar bu hafta profilaktika choralarini mas’uliyat bilan ko‘rishlari kerak. Agar kasallanish darajasi pasaysa, ta’tillar rejalashtirilganidek boshlanadi. Agar kasallanish darajasi pasaymasa, aksincha o‘sishda davom etsa, keyingi yetti kun davomida ta’lim masofadan turib amalga oshirilishi kerak, — dedi Bosh vazir.

Shuningdek, Bosh vazir Ta’lim vazirligiga ta’lim onlayn rejimga o‘tkazilsa, ta’lim jarayonining sifati va barqarorligini ta’minlash uchun Raqamli rivojlanish, innovasiyalar va kommunikasiyalar vazirligi va mobil operatorlar bilan birgalikda ishlashni buyurdi.

Yig‘ilish davomida Bosh vazir fuqarolarni vahimaga solmaslik zarurligini ta’kidladi.

Eng muhimi, fuqarolarni vahimaga solmaslik, ularni to‘g‘ri tashkil etish va kasalxonalarga yukni zudlik bilan kamaytirish. Fuqarolarga tezkor xizmat ko‘rsatish, onlayn uchrashuvlar, konsultasiyalar uchun ishonch telefonlaridan foydalanish. Sog‘liqni saqlash vazirligiga shifokor qabuliga uzoq kutish muammosini hal qilish uchun qabul punktlarini ochish zarurligini alohida eslatmoqchiman, — dedi u.