Muftiy yoshlarni oilaviy hayotga tayyorgarlik kurslarida o‘qishga chaqirdi

Tojikiston muftiysi Saidmukarram Abdulqodirzoda yoshlarga to‘ydan oldin oilaviy hayotga tayyorgarlik kurslarini o‘tashni tavsiya qildi. U bu haqda 11 oktyabr kuni Ulamolar kengashi tomonidan e’lon qilingan videoda ma’lum qildi.

Muftiy yosh oilalar o‘rtasida ajrimlar soni ortib borayotganidan xavotir bildirdi. U yoshlar turmush qurishdan oldin oilaviy hayot haqidagi kitoblarni o‘qishi va maxsus tayyorgarlik kurslaridan o‘tishi kerakligini aytdi.

Saidmukarram Abdulqodirzoda oilaviy hayotga tayyorgarlik nafaqat diniy, balki psixologik, sosiologik va insoniy munosabatlar nuqtayi nazaridan ham muhimligini ta’kidladi. U oilani saqlab qolish mas’uliyati er-xotinning birdek zimmasida ekanini bildirdi.

Abdulqodirzoda misol tariqasida bir mamlakat tajribasini keltirdi. U yerda nikohlarning 80–85 foizi ajrim bilan yakunlangan. Oilaviy hayotga tayyorlovchi qisqa muddatli kurslar joriy etilgach, ajrimlar ulushi 25 foizgacha kamaygan. Biroq muftiy aynan qaysi mamlakat haqida gapirayotganini aytmadi.

Uning fikricha, bunday kurslar yoshlarga er-xotinning majburiyatlarini yaxshiroq tushunishga va birgalikdagi hayotga tayyorgarlik ko‘rishga yordam beradi.