Aytish joiz, “Inter Mayami”ning 36 yoshli hujumchisi ayni payt Argentina terma jamoasi safida 20 iyun-14 iyul kunlari AQShda bo‘lib o‘tadigan Amerika qit’asi kubogiga tayyorgarlik ko‘rmoqda. Joriy yil fevral oyida Argentina U23 terma jamoasi bosh murabbiyi Xavyer Maskerano Messi “Parij-2024”da Olimpiya terma jamoasi safida maydonga tushishga rozilik berganini aytgandi.
2008 yil Pekinda Olimpiada g‘olibligiga erishgan Lionel esa bu xususda boshqacha fikr bildirdi:
– Parij haqida o‘ylash qiyin, chunki biz Amerika kubogiga tayyorlanyapmiz. Ikki-uch oy ketma-ket klubda bo‘lmayman. Qolaversa, hozir hamma joyda bo‘ladigan yoshda ham emasman.
Barselona afsonasi 2026 yil AQSH, Kanada va Meksikada o‘tkaziladigan jahon chempionatida qatnashish imkoniyatini istisno etmadi:
– Rekordlar o‘rnatish, muvaffaqiyatga erishishda davom etish – ajoyib! Agar o‘zimni yaxshi his qilsam, ikki yildan keyingi jahon futbolining eng yirik musobaqasida Argentina safida maydonga tushaman.
Eslatib o‘tamiz, “Parij-2024” dasturidagi futbol bo‘yicha erkaklar jamoalari musobaqasi 24 iyul-9 avgust kunlariga to‘g‘ri keladi. Argentina “V” guruhida Marokash, Iroq, Ukraina jamoalari bilan kuch sinashadi. O‘zbekiston Olimpiya terma jamoasi esa “S” guruhida Ispaniya, Misr va Dominikana Respublikasi bilan kurash olib boradi.
