Mask Ukrainaga Rossiya hududida Starlinkdan foydalanish imkonini beradimi?

Finlyandiya prezidenti Maskni Ukrainaga Rossiya hududida Starlinkdan foydalanish imkonini berishga chaqirdi.

Finlyandiya prezidenti Aleksandr Stubb Ilon Maskni Ukrainaga Rossiya hududida ham Starlink sputnik internet tizimidan strategik maqsadlarda foydalanish imkonini berishga chaqirdi.

«Men Ilon Maskni ukrainlarga ballistik raketalar uchiriladigan hududlarda — ham Ukrainaning bosib olingan hududlarida, ham Rossiyada — Starlinkdan strategik maqsadlarda foydalanish imkonini berishga chaqiraman. Chunki bu insonlar hayotini saqlab qolishi mumkin», — dedi Stubb Reuters agentligiga BMT Bosh Assambleyasi doirasida Nyu-Yorkda bergan intervyusida.

Stubbning fikricha, hozir Ukrainaga uchta asosiy yo‘nalishda yordam zarur. Birinchisi — havo mudofaasi. Uning ta’kidlashicha, ma’lum darajada Starlink ham havo hujumlaridan himoyani kuchaytirishga yordam berishi mumkin.

Qolgan ikki ustuvor yo‘nalish sifatida u qo‘shimcha elektr generatorlari va moliyaviy yordamni qayd etdi.

«Biz hozir shu masalalar ustida ishlayapmiz. Qishki chora-tadbirlar paketini shakllantirmoqdamiz. Chunki urush qishdan oldin tugashi mumkinligini ko‘rsatuvchi belgilarni ko‘rmayapman», — dedi Stubb.

Ukraina rasmiylari Rossiya hududida Starlinkdan foydalanish imkoniyati Ukraina Qurolli kuchlariga qishdan oldin ballistik raketalar uchirish qurilmalariga zarba berish imkonini oshirishini bildirmoqda.

Kiyevda Rossiyada bunday hujumlardan himoyalanish uchun yetarlicha raketani tutib qoluvchi vositalar mavjud emasligi ta’kidlanmoqda. Vladimir Zelenskiy ham iyul oyida Donald Trampga shunga o‘xshash iltimos bilan murojaat qilgan edi.

Ukrainaning Fire Point kompaniyasi hammuassisi Denis Shtilerman avvalroq Ukraina front chizig‘i bo‘ylab zarar yetkazish hududini shakllantirish uchun Starlinkdan allaqachon foydalanayotganini aytgan. Uning so‘zlariga ko‘ra, Rossiya hududida tizimdan foydalanish imkoniyati zarba berish masofasini yana 500 kilometrga — «Sibirgacha» uzaytirish imkonini beradi.