Manfaatlar to‘qnashuvi: 344 holat aniqlandi, 224 taga jarima qo‘llanildi

Korrupsiyaga qarshi kurash agentligi davlat organlari va tashkilotlarida manfaatlar to‘qnashuvi bo‘yicha qonun talablariga amal qilinishi holati yuzasidan tekshiruvlar olib borganini ma’lum qildi.

Ushbu jarayonda Andijon, Buxoro, Jizzax, Qashqadaryo, Navoiy, Namangan, Samarqand, Surxondaryo, Xorazm, Toshkent va Farg‘ona viloyatlari, shuningdek, Toshkent shahri qamrab olindi.

Tekshiruvlar natijasida 344 ta ma’muriy huquqbuzarlik holati aniqlandi. Ulardan:

• 224 ta ish bo‘yicha jarimalar to‘langan,
• 116 ta ish bo‘yicha sud qarorlari ijrosi kutilmoqda,
• 4 ta ish hozirda sudda ko‘rib chiqilmoqda.

Huquqbuzarlik holatlari Administrativ javobgarlik to‘g‘risidagi kodeksning 193⁻⁴-moddasiga muvofiq rasmiylashtirilib, “E-maʼmuriy ish” tizimi orqali sudlarga yuborildi.

Manfaatlar to‘qnashuviga yo‘l qo‘yilgan holatlar sohalar kesimida:

• 212 nafar – mahalliy hokimliklar,
• 31 nafar – qishloq xo‘jaligi,
• 24 nafar – yoshlar siyosati,
• 13 nafar – maktab va maktabgacha ta’lim,
• 10 nafar – moliya tizimi,
• 9 nafar – bandlik sohasi,
• 6 nafar – kadastr,
• 5 nafardan – sanitariya va favqulodda vaziyatlar,
• 4 nafardan – sog‘liqni saqlash va ekologiya,
• 3 nafardan – veterinariya, sport, oliy ta’lim va adliya,
• 2 nafardan – madaniyat, investisiya, suv xo‘jaligi,
• 1 nafardan – oila va xotin-qizlar, qurilish hamda ilmiy-tadqiqot muassasalarida.

Agentlik tomonidan bu kabi holatlarning oldini olish ishlari davom ettirilmoqda.