Maktablarda AKT va sun’iy intellekt fanlari yo‘lga qo‘yiladi

O‘tgan yildan boshlab mamlakatimizda 1-sinflardan axborot texnologiyalari fanlari o‘qitila boshlandi. Keyingi o‘quv yilidan esa yuqori sinflar uchun sun’iy intellekt bo‘yicha darslar joriy etiladi.

Buning uchun 2 mingta sinf xonasi kompyuter bilan jihozlanishi, 6 ming 300 ta interfaol doska o‘rnatilishi zarur. Ushbu maqsadlar uchun mablag‘lar kelgusi yil davlat byudjetida nazarda tutiladi.

Iqtidorli o‘quvchilar uchun viloyatlarda quyidagi ixtisoslashgan maktablar filiallari tashkil etiladi:

• Axborot texnologiyalari yo‘nalishida — Al-Xorazmiy maktablari,

• Muhandislik bo‘yicha — Mirzo Ulug‘bek maktablari,

• Tabiiy fanlar yo‘nalishida — Ibn Sino maktablari.

Ushbu maktablar hududlardagi texnika oliygohlariga biriktiriladi. Yaxshi natijalarga erishgan bitiruvchilar esa ushbu oliygohlarning 2-kursiga qabul qilinadi.

2026 yilda maktab o‘quvchilari o‘rtasidagi eng nufuzli ikkita — Xalqaro kimyo va informatika olimpiadalari Markaziy Osiyo davlatlari ichida ilk bor O‘zbekistonda o‘tkaziladi.

Bosh vazirga mazkur olimpiadalarni poytaxtimizda yuqori saviyada o‘tkazish uchun barcha tashkiliy masalalarni nazoratga olish topshirildi.