Makron yaqin yillarda Fransiya harbiy xarajatlarini keskin oshirishini ma’lum qildi

Fransiya prezidenti bu haqda mamlakat Qurolli kuchlariga qilgan murojaatida e’lon qildi.

Makronning ma’lum qilishicha, 2027 yilda mudofaa uchun 64 milliard yevro ajratiladi – bu 2017 yildagi ko‘rsatkichdan ikki baravar ko‘p. U aslida harbiy byudjetni 2030 yilgacha ikki baravar oshirish rejalashtirilgani, ammo bu maqsadga 2027 yildayoq erishilishini bildirgan.

Rejaga ko‘ra, 2026 yilda mudofaa uchun 3,5 milliard yevro, 2027 yilda esa yana 3 milliard yevro qo‘shimcha mablag‘ ajratiladi.

Makron, ayniqsa, o‘q-dorilar zaxirasini to‘ldirish, uzoq masofali artilleriya qurollarini yangilash, yuqori aniqlikdagi qurollarni rivojlantirish, dronlar sonini oshirish zarurligini ta’kidlagan. U shuningdek, Fransiyaning havo hujumidan mudofaa tizimini kuchaytirish va kosmik sohadagi salohiyatni oshirishga chaqirdi.