Lavrov tufayli G20 sammitida vazirlar birgalikda suratga tushishni rad etdi

Uchrashuv AQShning Atlanta shahrida bo‘lib o‘tdi, unga davlat kotibi Marko Rubio raislik qildi. Yevropalik diplomatlar G20 tashqi ishlar vazirlari yig‘ilishida Rossiya tashqi ishlar vaziri Sergey Lavrov bilan suratga tushishdan bosh tortdi. Natijada amerikalik mezbonlar rejalashtirilgan birgalikda suratga tushishni bekor qildi.

"Ayrim delegasiyalar birgalikda suratga tushishni istamagani uchun ushbu tadbir bekor qilindi. Rasmiy suratga tushish marosimi diplomatik chalg‘ituvchi omilga aylanishiga yo‘l qo‘ymaslik uchun, AQSh bundan voz kechib, asosiy e’tiborni muhim muzokaralarga qaratdi", — dedi AQSh Davlat departamentining rasmiy vakili.

Sammit davomida Buyuk Britaniya tashqi ishlar vaziri Ed Miliband rossiyalik hamkasbiga murojaat qildi.

"Rossiya tashqi ishlar vaziriga to‘g‘ridan to‘g‘ri aytmoqchiman: bu urushda kim tajovuzkor ekanini hammamiz yaxshi bilamiz. Bu urush shunchaki Yevropa yoki NATO uchun sinov emas, u barchamizdan Putinni bu vahshiyona urushni davom ettiradigan daromadlardan mahrum qilish uchun iqtisodiy va diplomatik bosim o‘tkazishni talab etadi", — dedi u.

Miliband Rossiya hukumatini Ukrainada tinch aholining o‘limiga sabab bo‘layotganlikda aybladi. Shuningdek, u G20 davlatlari “Ukrainada adolatli va mustahkam tinchlikni ta’minlash uchun ko‘proq ishlashi” kerakligini aytdi.

Ukraina G20 a’zosi bo‘lmasa-da, so‘nggi yillarda shunga o‘xshash yig‘ilishlarga taklif qilib kelinayotgan edi. Biroq bu safargi uchrashuvga Ukraina taklif etilmadi.