Pxenyan Xalqaro atom energiyasi agentligi (MAGATE) tomonidan KXDRning yadro dasturi bo‘yicha qabul qilingan rezolyusiyani rad etdi va agentlik mamlakatning yadroviy faoliyatini nazorat qilish huquqiga ega emasligini bildirdi. Bu haqda Koreya Mehnat partiyasi Markaziy qo‘mitasi bo‘limi rahbari Kim Yo Chjon ma’lum qildi. Uning bayonoti 19 sentyabr kuni Koreya Markaziy telegraf agentligi (STAK) tomonidan tarqatildi.
17 sentyabr kuni MAGATEning 70-Bosh konferensiyasida KXDR Yadroviy qurollarni tarqatmaslik to‘g‘risidagi shartnoma (YAQTTSh) doirasida yadroviy qurolga ega davlat maqomiga ega bo‘la olmasligi ta’kidlangan rezolyusiya qabul qilindi. Pxenyan yadroviy dasturi bilan bog‘liq faoliyatini to‘xtatishga chaqirildi.
Kim Yo Chjon rezolyusiyani «ma’nosiz va samarasiz» deb atab, bunday hujjatlar har yili AQSh va G‘arb davlatlari tashabbusi bilan qabul qilinishini va ular KXDRning yadroviy maqomini o‘zgartira olmasligini bildirdi.
Uning ta’kidlashicha, Pxenyan YAQTTSh va MAGATEdan allaqachon chiqqan. Shu sababli Shimoliy Koreya hukumati fikriga ko‘ra, agentlik mamlakatning yadroviy faoliyatiga aralashish vakolatiga ega emas.
KXDR vakili, shuningdek, MAGATEni «ikki xil standart»da yondashishda aybladi. Xususan, u Yevropada Amerika yadroviy qurollarining joylashtirilishi va birgalikda qo‘llanilishi, AQShning Janubiy Koreya va Yaponiya ishtirokidagi kengaytirilgan tiyib turish tizimi hamda Seulning atom suvosti kemalarini yaratish rejalarini misol sifatida keltirdi.
KXDR Tashqi ishlar vazirligi alohida bayonotida mamlakatning yadroviy maqomi qaytarilmas ekanini ta’kidladi.
Dunyoda atigi uch kishi xorijga pasportsiz sayohat qilishi mumkin
Muhojirlar ketmoqda — Moskva esa qaytishga chaqirmoqda
Amanbay Orinbayevga general-mayor unvoni berildi
