Kiyev qarz to‘lovini rad etdi

Ukraina iqtisodiy o‘sishga bog‘liq davlat qarzi bo‘yicha 665 million dollarlik to‘lovni amalga oshirmasligini ma’lum qildi.

Kiyev YAIM o‘sishiga bog‘liq holda to‘lanadigan, GDP-warrants deb ataladigan obligasiyalar bo‘yicha 665 million dollar to‘lamaslik qarorini qabul qildi. To‘lov 2 iyun kuni amalga oshirilishi kerak edi, biroq Aurelius va VR Capital kabi fondlar bilan 3,2 milliard dollarlik qarzni qayta tuzish bo‘yicha muzokaralar muvaffaqiyatsiz yakunlandi, deb xabar bermoqda Bloomberg.

Ukraina Moliya vazirligi to‘lovlarga moratoriy qayta tuzish jarayoni tugaguncha kuchda qolishini bildirdi. Ushbu qimmatli qog‘ozlar o‘tgan yilgi qarzni yengillashtirish bitimiga kiritilmagani sababli, endi muammoli aktivlar sifatida baholanishi mumkin.

Avvalroq Ukraina 2023 yilda shunday qog‘ozlar uchun taxminan 200 million dollar to‘lagan edi. Fitch ma’lumotlariga ko‘ra, mamlakatning reytingi "cheklangan defolt" darajasida qolmoqda.