Kazemiro Rodrining "Oltin to‘p"ni qo‘lga kiritganiga munosabat bildirdi

"Manchester Yunayted" yarim himoyachisi Kazemiro Rodrining "Oltin to‘p" uchun kurashdagi g‘alabasi haqida o‘z fikrlari bilan o‘rtoqlashdi.

"Manchester Siti" yarim himoyachisi mukofotni oktyabr oyida bo‘lib o‘tgan marosimda oldi. Ispaniyalik futbolchi ovoz berishda "Real" hujumchisi Vinisius Juniordan ustun keldi.

"Albatta, men hayratda qoldim. Rodri "Oltin to‘p"ga loyiq emas edi demayman, lekin Vinining o‘tgan mavsumdagi muvaffaqiyatini inkor etib bo‘lmaydi. U barcha sovrinlarni qo‘lga kiritdi, "Uembli"da Chempionlar ligasi finalida gol urdi, g‘alabada asosiy rol o‘ynadi. Ha, bu men uchun syurpriz bo‘ldi, lekin futbol shunday qarorga keldi. Rodrini hurmat qilmasdan ilojim yo‘q - u ajoyib o‘yinchi", - dedi Kazemiro.