Kaxovka GESidagi qurbonlar haqida rasmiy ma’lumot berildi

Ukraina tomoni Xerson viloyatining bosib olingan hududlarida birinchi qurbonlar haqida ma’lum qildi. Qutqaruv ishlari davom etmoqda.

Evropa Ittifoqi jabrlangan hududlarga yordam yuboradi

Ukraina rasmiylari Xerson viloyatining Rossiya tomonidan bosib olingan Alyoshki shahrida kamida uch kishi cho‘kib ketganini ma’lum qilgan. Xabarlarga ko‘ra, shaharning 90 foizi suv ostida qolgan, ayrim ko‘chalarda suv sathi uch metrga yetgan.

Ammo qurbonlar yanada ko‘proq bo‘lishi mumkin. Polisiya qutqaruvchilari kechayu kunduz rezina qayiqlarda Xersonning suv bosgan ko‘chalarini o‘rganib, suv oqimidan jabr ko‘rganlarni qidirmoqda.

Ukraina prezidenti Vladimir Zelenskiy xalqaro gumanitar tashkilotlarni falokat natijasida uylaridan ayrilgan odamlarga yordam berish uchun shoshilinch choralar ko‘rishga chaqirdi.

“Hozirgi paytda sodir bo‘layotgan voqealarga butun dunyoning aniq va tezkor munosabati kerak. Xerson viloyatining vaqtincha bosib olingan hududida qancha odam qutqarilmasdan, ichimlik suvisiz, oziq-ovqatsiz, tibbiy yordamsiz o‘lishi mumkinligini aniqlashning iloji yo‘q. Harbiy va razvedka idoralarimiz o‘qqa tutilayotganiga qaramay, imkon qadar odamlarni qutqarib qolishmoqda”, degan Ukraina prezidenti.

Evropa Ittifoqi o‘zining fuqarolik himoyasi mexanizmi orqali yordam jo‘natishini aytdi va birinchi takliflar allaqachon Germaniya, Avstriya va Litvadan olingan.

Yordam suv filtrlari, generatorlar va suv nasoslari, shuningdek, vaqtinchalik boshpana uchun materiallar, jumladan, chodirlar, ko‘rpa-to‘shaklar va adyollarni o‘z ichiga oladi.

Rossiya o‘zi nazorat qilayotgan Xerson viloyatining ayrim hududlariga qutqaruvchilar va yordam uskunalarini yuborayotganini ma’lum qildi.

Moskva ham, Kiyev ham bir-birini to‘g‘onni buzishda ayblamoqda, xalqaro hamjamiyat xulosa chiqarishga shoshilmayapti va yangi dalillarni kutishni ma’qul ko‘rmoqda.