2025 yilda Afrikaning eng yaxshi futbol hakami deb topilgan somalilik referi Omar Artanga AQShga kirishga ruxsat berilmadi. FIFA tomonidan 2026 yilgi jahon chempionatida ishlaydigan hakamlar ro‘yxatiga kiritilgan mutaxassis Mayami aeroportida chegara nazoratidan o‘ta olmagan.
Reuters agentligining xabar berishicha, qaror o‘tgan hafta oxirida qabul qilingan. Omar Artan AQShga yetib kelganidan so‘ng mamlakatga kirish huquqidan mahrum qilingan va chegara xizmati tomonidan orqaga qaytarilgan.
FIFA ushbu holat bo‘yicha izoh berib, qabul qiluvchi davlatning migrasiya va viza masalalariga aralashmasligini ma’lum qildi.
«FIFA mezbon mamlakatning immigrasiya tartib-taomillarida, jumladan viza masalalarida ishtirok etmaydi. Vakolatli idoralar bizga janob Artanning maqomi hozircha qayta ko‘rib chiqilmasligini ma’lum qildi», dedi federasiya vakili.
AQSh Bojxona va chegara xizmati ham bu voqeani tasdiqlagan. Biroq idora bayonotida hakamning ismi ochiqlanmagan va mamlakatga kirish rad etilganining aniq sabablari keltirilmagan. Faqat Mayami aeroportiga kelgan Somali fuqarosiga kirish taqiqlangani ma’lum qilingan.
Omar Artan esa vaziyatga qaramay, faoliyatini davom ettirish niyatida ekanini bildirdi. U o‘zini qo‘llab-quvvatlagan futbol jamoatchiligiga minnatdorlik izhor qildi va hamkasblariga jahon chempionatida omad tiladi.
Omar Artan jahon chempionati final bosqichi o‘yinlariga jalb qilingan birinchi somalilik referi sifatida ham tarixga kirgan.
Kuzatuvchilarning fikricha, mazkur qaror sport va migrasiya siyosati kesishgan nuqtada yuzaga kelgan bahsli holatlardan biri bo‘lib, jahon chempionati oldidan katta muhokamalarga sabab bo‘lishi mumkin.
O‘zbek futbolchilarining o‘yindan keyin qilgan ishi kanadaliklarni hayratga soldi!
Million rossiyalik mamlakatni tark etdi
O‘zbekiston – Niderlandiya o‘rtoqlik o‘yini Nyu-Yorkda bo‘lib o‘tadi
