Hindiston Ittifoqining Jammu va Kashmir hududidagi terakt oqibatida yetti nafar tinch aholi – olti nafar ishchi va bir shifokor halok bo‘ldi, besh nafari yaralandi.
Bu haqda Ittifoq hududi polisiyasi xabar berdi.
Hujumchilar Gund hududida tunnel qurilishi bilan shug‘ullanuvchi xususiy kompaniya ishchilari joylashgan lagerga qarata o‘t ochgan. Polisiya ma’lumotlariga ko‘ra, lagerga qurollangan ikki kishi kirib, elektr energiyasini uzib, odamlarni otib tashlagan. Hujum sodir bo‘lgan hudud o‘rab olingan, terrorchilarni qidirish ishlari davom etmoqda.
India Today telekanali manbalarga tayanib xabar berishicha, hujum uchun javobgarlikni Pokistonda joylashgan Qarshilik fronti terrorchilik guruhi o‘z zimmasiga olgan. U so‘nggi bir yarim yil davomida Kashmirda faol bo‘lgan, deya eslaydi telekanal.
Kashmir Hindiston va Pokiston o‘rtasida 1947 yilda Britaniya Hindistoni mustaqil bo‘lib, diniy jihatdan ikki davlatga bo‘linganidan beri bahs bo‘lib kelmoqda. Bu hududda 1947 va 1965 yillarda Hindiston-Pokiston urushlari boshlangan. Hozirda Kashmirda davlat chegarasi yo‘q: uning hududi Nazorat chizig‘i bilan bo‘lingan, bu yerda harbiy keskinlik saqlanib qolmoqda. Hindiston qismida mamlakatdan ajralib chiqish tarafdori faol guruhlar mavjud. Yangi Dehli Islomobodni ekstremistlarni qo‘llab-quvvatlashda ayblaydi.
Eron o‘rab olinmoqda
Qozog‘iston shimoli odamlarsiz qolishi mumkin
Antarktida yashil rangga aylana boshladi
