Ispaniya qirolining 1609 yilgi oltin tangasi 3,5 million dollarga sotildi

Birinchi marta 1609 yilda qirol Filipp III buyrug‘i bilan chiqarilgan 100 eskudo nominal qiymatiga ega Ispaniya oltin tangasi Jenevadagi Numismatica Genevensis SA auksion uyida 2,8 million Shveysariya frankiga (3,5 million dollar) sotildi va Yevropada auksionda sotilgan eng qimmat tanga bo‘ldi. Bu haqda TASS auksion uyining matbuot xizmatiga tayanib xabar berdi.

Tashkilot ma’lumotlariga ko‘ra, og‘irligi 339 gramm bo‘lgan bu tanga XVII asrda Ispaniya qiroli tomonidan chiqarilgan eng katta oltin tanga hisoblanadi. Tanga kundalik muomala uchun mo‘ljallanmagan, balki Ispaniya qirolligining boyligi va qudratini namoyish etish uchun yaratilgan.

Auksion uyining ma’lumotlariga ko‘ra, tanga Segoviya shahrida Amerikani zabt etgan ispanlar olib kelgan oltindan zarb qilingan. Tangada Kastiliya va Leon, Aragon, Portugaliya, Avstriya, Burgundiya, Brabant va o‘sha paytda Gabsburglar tomonidan nazorat qilingan boshqa mintaqalarning gerblari tasvirlangan. Ushbu nomdagi yana bir nechta tangalar 1614 va 1620 yillar oralig‘ida Filipp III buyrug‘i bilan zarb qilingan.