Hindiston va Xitoy o‘rtasidagi parvozlar besh yillik tanaffusdan so‘ng qayta tiklandi

Hindiston va Xitoy o‘rtasida besh yillik tanaffusdan keyin to‘g‘ridan-to‘g‘ri havo qatnovlari qayta tiklandi. Bu ikki qo‘shni davlat o‘rtasidagi munosabatlar iliqlashayotganidan dalolat beradi.

26 oktyabr kuni “IndiGo” aviakompaniyasining 6E 1703 reysi Hindistonning Kolkata aeroportidan uchib, uch yarim soatdan so‘ng Xitoyning janubidagi Guanchjou shahriga qo‘ndi.

Hindiston va Xitoy o‘rtasidagi reyslar 2020 yil boshida COVID-19 pandemiyasi boshlanishi va Himoloydagi nizoli chegara hududida yuz bergan qurbonlar bilan yakunlangan to‘qnashuvdan so‘ng to‘xtatilgan edi.

Ikki yadroviy davlat o‘tgan yil kuzida chegaradagi harbiy qismlarni ajratish bo‘yicha kelishuvga erishgan va besh yil ichida ilk bor yuqori darajadagi muloqotni tiklagan.

Xitoyning Hindistondagi elchixonasi matbuot kotibi Yu Jing ijtimoiy tarmoqdagi xabarda shunday yozdi:

“Xitoy va Hindiston o‘rtasidagi to‘g‘ridan-to‘g‘ri parvozlar endi haqiqatga aylandi.”

Davlatga tegishli China Eastern Airlines kompaniyasi 9 noyabr kuni Shanxay — Dehli yo‘nalishini qayta ochishi kutilmoqda. Shuningdek, IndiGo 10 noyabrdan boshlab yangi Dehli — Guanchjou qatnovini yo‘lga qo‘yadi.

Hindiston hukumati ma’lum qilishicha, parvozlarning qayta tiklanishi “odamlar o‘rtasidagi muloqotni osonlashtiradi” va “ikki tomonlama munosabatlarni bosqichma-bosqich normallashtirishga yordam beradi”.

Kolkata aeroporti direktori Pravat Ranjan Beuriyaning aytishicha, ilk reys bortida 176 nafar yo‘lovchi bo‘lgan.

Yo‘lovchilardan biri, ishbilarmon Krishna Goyal, ANI agentligiga bergan intervyusida shunday dedi:

“Besh yil davomida biz ko‘pincha Singapur orqali ikki yoki uchta reysni almashtirishimizga to‘g‘ri kelardi. Bu to‘g‘ridan-to‘g‘ri qatnov biz uchun katta qulaylik yaratdi.”

Yangi havo yo‘nalishi Kolkataning rivojlanayotgan to‘qimachilik va jut sanoatini janubiy Xitoyning ulgurji bozorlari bilan yanada bog‘laydi. Shu tariqa, Osiyoning ikki yirik mamlakati AQSh prezidenti Donald Trampning tariflar bo‘yicha tahdidlariga qaramasdan, savdo aloqalarini mustahkamlamoqda.