"Hayotimiz baxtsiz va azob-uqubatlarga to‘la"

Isroilning insonparvarlik blokadasi tufayli G‘azo sektorini yoqilg‘i va gaz tanqisligi inqirozi qamrab oldi.

Shuningdek, un taqchilligi ham kuzatilmoqda. Bu esa non ishlab chiqarishga ta’sir ko‘rsatib, narxlarni blokadadan oldingi darajadan taxminan to‘rt barobar oshirdi.

"Al Jazeera" janubiy Xon Yunus shahrida hali ham faoliyat yuritayotgan kam sonli novvoyxonalardan biriga tashrif buyurib, qamal odamlarning turmushiga qanday ta’sir ko‘rsatayotgani haqida suhbatlashdi.

"Oilam uchun non sotib olish maqsadida ertalab soat yettida keldim. Beshta bolani boqish va ta’minlash mening zimmamda. Bir farzandimni xayriya tashkilotiga, boshqasini suv keltirishga yubordim. O‘zim esa 12 kilometrcha yo‘l bosib, oilaga non topish uchun shu yerga keldim," dedi erkaklardan biri.

"Chegara o‘tish joylarining yopilishi fojiali oqibatlarga olib keladi. Novvoyxonadan non olish paytidagi tiqilinch va talash-tortishlar tufayli jonidan ayrilgan odamlar bor," deya ta’kidladi boshqa bir erkak "Al Jazeera"ga.

"Bolalarimga iftorlik tayyorlashim kerak, uyga qaytishim zarur," - dedi novvoyxonadagi ayol. "Gaz yo‘qligi sababli ovqat pishirishda o‘tin ishlatishga majburman. Hayotimiz qiyinchilik va azob-uqubatlarga to‘la," - deya qo‘shimcha qildi u.