Germaniya Ukraina bilan harbiy hamkorlik bo‘yicha 10 banddan iborat rejani taqdim etdi

Germaniya hukumati Ukraina mudofaa sanoati bilan hamkorlikni chuqurlashtirishga qaratilgan 10 banddan iborat yangi rejani e’lon qildi.

Berlin ukrain korxonalarini Yevropa qurol-yarog‘ bozoriga faolroq jalb etishni, shuningdek, Ukrainada ishlashga tayyor bo‘lgan nemis kompaniyalarini qo‘llab-quvvatlashni rejalashtirmoqda. Buning uchun Germaniya hukumati Ukraina mudofaa sohasiga kirishga qaror qilgan biznes uchun investisiya kafolatlarini taqdim etishini va’da qildi.

Rejaning asosiy bandlaridan biri — Ukraina mudofaa sanoatini YEI umumiy mudofaa bozoriga yanada yaqin integrasiya qilishga erishish niyatidir. Hujjatda bu maqsadda qurol-yarog‘larni qo‘shma xarid qilish uchun mo‘ljallangan Yevropa moliyalashtirish instrumentlaridan foydalanish lozimligi ochiq aytilgan. Amalda gap ukrain zavodlarini umumevropa qurol ishlab chiqarish va yetkazib berish zanjirlarining bir qismiga aylantirish haqida ketmoqda.

Rejaning amaliy tomoni ham ancha aniq belgilab qo‘yilgan. Germaniya YEIdagi hamkorlari bilan birga Ukraina uchun qurol-yarog‘ va harbiy tizimlarni sotib olishni, jumladan, to‘g‘ridan-to‘g‘ri Ukraina hududida ishlab chiqarilgan mahsulotlarni ham xarid qilishni rejalashtiryapti.

Aniq misol sifatida Berlinda ukrain ishlab chiqarishidagi uchuvchisiz apparatlar tilga olinmoqda. Germaniya tomoni baholashicha, bunday dronlar kelajakdagi umumevropa havo mudofaasi tizimi doirasida qiziqish uyg‘otishi mumkin.