Germaniya Ichki ishlar vazirligi yangi migrasiya siyosatining ilk natijalarini taqdim etdi

Ichki ishlar vaziri Aleksandr Dobrindtning yangi migrasiya siyosati allaqachon o‘zining ilk natijalarini bermoqda. Hukumat almashganidan so‘ng chegara nazorati kuchaytirildi va ba’zi boshpana izlovchilarga kirishni rad etish amaliyoti boshlandi. Hozirda vazirlik birinchi statistik natijalarni taqdim etdi.

To‘rt hafta ichida boshpana so‘rab murojaat qilganlar soni 36,5 foizga kamaydi. Shu bilan birga, kirishni rad etishlar soni ortdi: 2861 ta shunday holat qayd etilgan, bu avvalgi hukumat davridagiga nisbatan 42,3 foizga ko‘pdir. Shu bilan birga, BILD manbalariga ko‘ra, chegarada joylashtirilgan polisiya xodimlari soni uch mingdan 14 mingga ko‘paygan.

Germaniya Ichki ishlar vazirligi yangi hukumatning qat’iy yo‘lini o‘zini oqladi, deb hisoblaydi.

"Raqamlar chora-tadbirlar samara berayotganini yaqqol ko‘rsatmoqda. Aniqlangan qonunbuzarliklar sonining ortishi nazorat kuchaytirilgani bilan bog‘liq", - deyiladi xabarda.

8 maydan buyon polisiya chegaralarda faol ishlamoqda: shu vaqt ichida 184 kishi kirish taqiqlangan holda qo‘lga olindi, 139 nafar noqonuniy migrant tashuvchisi qo‘lga olindi, 859 kishi esa amaldagi hibsga olish orderi bilan qo‘lga olindi. Bundan tashqari, polisiya chegarada 92 nafar ekstremistni aniqladi, ular orasida radikal islomchilar ham bor.