Germaniya fuqarolarining atigi 14 foizi Mersni yaxshi kansler deb hisoblaydi

Germaniya fuqarolarining atigi 14 foizi Fridrix Mersni yaxshi kansler deb hisoblaydi.

BILD nashri uchun maxsus o‘tkazilgan INSA so‘roviga ko‘ra, nemislarning atigi 14 foizi Fridrix Mersni yaxshi kansler deb biladi. 78 foiz respondent esa uning hukumat rahbari lavozimida qolishiga qarshi. Hatto XDS/XSS (CDU/CSU) tarafdorlari orasida ham Mersni qo‘llab-quvvatlovchilar atigi 36 foizni tashkil etadi, 58 foiz esa unga qarshi.

Blokdagi siyosatchilar orasida Mersga eng mashhur muqobil nomzod XSS rahbari Markus Zyoder bo‘ldi: uni barcha respondentlarning 31 foizi, XDS/XSS tarafdorlarining esa 50 foizi ma’qul ko‘rgan. Keyingi o‘rinlarda Shimoliy Reyn — Vestfaliya bosh vaziri Xendrik Vyust — 20 foiz, ichki ishlar vaziri Aleksander Dobrindt — 13 foiz bilan qayd etilgan.

Koalisiyadagi hamkor — SDPGda ham muammolar mavjud. Respondentlarning 51 foizi Lars Klingbayl endi SDPG rahbari bo‘lishga mos emas, deb hisoblaydi, uni qo‘llab-quvvatlovchilar esa 24 foiz. Ehtimoliy vorislar orasida eng mashhuri mudofaa vaziri Boris Pistorius bo‘ldi — uni barcha respondentlarning 34 foizi, SDPG saylovchilarining esa 51 foizi qo‘llab-quvvatlagan.

So‘rov shuningdek, «Germaniya uchun muqobil» (AfD) partiyasiga munosabatda jamiyat ikkiga bo‘linganini ko‘rsatdi: 42 foiz partiyani taqiqlashni qo‘llab-quvvatlaydi, 45 foiz esa bunga qarshi. AfDga nisbatan siyosiy «brendmauer» (izolyasiya siyosati)dan voz kechishni 46 foiz istaydi, 34 foiz esa bu siyosatni saqlab qolish tarafdori.