Futbolda darvozabonlar uchun vaqtni ushlab turish qoidasi o‘zgarmoqda

Xalqaro futbol assosiasiyalari kengashi (IFAB) 2025/26 yilgi mavsumdan boshlab o‘yin qoidalariga o‘zgartishlar kiritishini ma’lum qildi.

Eng asosiy yangilik – darvozabonlarning to‘pni qo‘lda ushlab turish vaqtiga oid qoida.

Yangi qoidaga ko‘ra, darvozabon to‘pni qo‘lida 8 soniyadan ortiq ushlab tura olmaydi. Oxirgi 5 soniyani hakam qo‘l ishorasi bilan sanab boradi.
Agar bu qoida buzilsa, raqib jamoa burchak zarbasini amalga oshirish huquqiga ega bo‘ladi.

Hozirgi amaldagi qoidaga ko‘ra, darvozabon to‘pni 6 soniyadan ortiq ushlab tursa, raqib jamoaga erkin zarba beriladi.

Bu o‘zgarish darvozabonlarning vaqtni cho‘zish taktikasini cheklash va o‘yinni tezlashtirish maqsadida joriy etilmoqda.